كارت عداد الكهرباء مسبوق الدفع أحيانًا يرفض الشحن بدون سبب واضح، لكن في الحقيقة هناك أسباب وحلول بسيطة يمكن أن تساعد في حل هذه المشكلة.
أسباب رفض كارت شحن عداد الكهرباء
من أكثر الأخطاء شيوعًا هو عدم “تفريغ” الكارت في العداد، قبل ما تشحن الكارت من “فوري” أو أي منفذ، لازم تحط الكارت في العداد وتتأكد إنه قرأ البيانات الحالية، لأن العداد لازم يعطي “أمر” للكارت إنه جاهز لاستقبال شحنة جديدة، لو الكارت لسه فيه بيانات شحنة قديمة، مش هيقبل الشحن الجديد.
كمان اتساخ الشريحة النحاسية الموجودة بالكارت ممكن يكون سبب، الشريحة دي حساسة جدًا ومع كثرة الاستخدام أو الرطوبة، ممكن تتراكم عليها طبقة من الأتربة أو الدهون، وده بيخلي العداد مش يقرأ الكارت.
في بعض الأحيان، الكارت يحتاج لتحديث بيانات أو تنشيط دوري من فرع شركة الكهرباء اللي تابع ليك، خصوصًا لو العداد تعرض لمجال مغناطيسي.
أما لو ظهرت على شاشة العداد رسائل خطأ زي (Err-0101) أو (Err-1102)، فده معناه إن الكارت فيه مشكلة فنية أو بيانات غير مطابقة، وهنا لازم تراجع الشركة.
خطوات سريعة لحل المشكلة في المنزل
لو العداد “مهنج” أو مش مستجيب، جرب تفصل المفتاح الأوتوماتيك العمومي اللي جنب العداد لمدة 30 ثانية، الحركة دي بتعمل إعادة تهيئة للنظام وممكن تحل المشكلة فورًا.
استخدم أستيكة رصاص عادية وامسح الشريحة النحاسية في الكارت برفق، أو ممكن تستخدم قطعة قماش فيها نقطة كحول بسيطة جدًا علشان تزيل أي طبقة عازلة.
عند إدخال الكارت، تأكد إنه وصل لآخر الفتحة، وانتظر حتى تسمع “الصافرة” وتظهر كلمة (Good) على الشاشة، لو ما ظهرتش، جرب تخرج الكارت وتدخله ببطء.
تحذيرات هامة للحفاظ على الكارت والعداد
من المهم عدم وضع الكارت بجوار الموبايل أو الراديو أو الميكروويف، لأن الموجات دي ممكن تمسح البيانات الموجودة على الشريحة.
كمان تجنب تجربة وضع كارت جارك في عدادك، لأن العداد ممكن يبرمج نفسه على كارت واحد ويقفل.
إذا جربت كل الخطوات السابقة ولسه العداد مش بيشحن، توجه لأقرب فرع للشركة ومعاك الكارت الخاص بالعداد وصورة واضحة للموبايل تظهر فيها رسالة الخطأ اللي على شاشة العداد.